أنا م الفلول ..
ولا عمري يوم ما أكلت فول ..
ولا وقفت استنى دوري فى الطابور ..
ولا عمري يوم حسيت بجوع ..
ولا عرفت يعني إيه معنى الخضوع ..
ولا يوم بكيت من حرقة الظلم وقساه ..
ده أنا كنت شايفه يا ناس إله ..
استغفر الله العظيم ..
عايزنّي بس أقول لمين !
إنه كان ظالم مُبين ..
وإنه نسي ف يوم انه كان عبد وفقير ..
مقدرش أقول غير اللى متعود عليه ..
ده انا بقوله يجي من حبة سنين ..
مش حفتكر أنا كنت مين ..
ما أنا أصلي ناسي يعني إيه كلمة ضمير ..
عايزني بس أقول لمين وأشهد بخير ..
معرفش غير إني يا ناس اشهد بزور ..
لاعمري يوم ما بكيت على حق الشهيد ..
ولا بحس بحرقة قلب أم على عمره اللى راح ..
وبقول ده راح .. أشهدله ليه ؟
لازم أبص لنفسي وبلاش الأنين ..
راح يعمل ايه حزن السنين ..
لازم أدوّر عجلة الإنتاج وازوّد مليونين ..
فبلاش تلوم ..
وتقوللي قولت ايه ف ساعة اللزوم ..
ما أنا قولتلك إنّى خلاص ..
مش باقي على حق اللى مات ولا بعترف بيوم الخلاص ……. وانى فلول !
ليست هناك تعليقات:
إرسال تعليق