لمّا تقرر تقلب الأرض والسماء بقوة ابتكارك وتشوف السما بحر والسحاب رغوة الموج وتسرح وتنجلى وتلاقى روحك فرحانة وتحس بنسمة الهوا بتخبط فيك بريحة يود البحر وروقانه ، وتنسى أي حاجة حواليك وفجأة تفوق على صوت بيقولك أقفل الشباك وادخل بقى حتاخد برد ..
إعرف سعتها إن جنابك مبتكر ..
آه مصنعتش آلة الزمن ولا عملت تصميم هندسى تُباع فكرته بالملايين .. لكنك صنعت الأهم والأغلى من كل ده ..
قدرت تصنع بابتكارك لحظة روقان وسعادة صافية وخليت خيالك سيد الكل وملك الأرض كلها ..
وده بقى فى حد ذاته كنز الكل بيتنافس عليه و ممكن يدفع كتيير أوي علشان يوصله .. وبكده يبقى أنت غني فعلاً ومحدش زيك .
إبتكر وأعمل من نفسك ملك ثري بروحه وإحساسه وصفائه وبلاش تخنق روحك بهموم الحياة طول الوقت ..
أسرق لحظة ابتكار ترفع روحك فووق وتجدد بيها أفكارك وتشحن فيها طاقتك علشان تقدر تكمل وتحقق أحلامك .
ليست هناك تعليقات:
إرسال تعليق