الحــــــــرّية

كلمة اتقالت يوم فى ميدان والناس سألت إيه معناها وإيه لزمتها وإيه حيفيد بس التغيير
كلمة وباعها كل جبان واللي شراها كان " إنسان " ماتت روحه تنطق آااااه حاملة التحرير
كلمة تهز الكون بصداها وبقوتها نخلق دنيا تحقق عدل فيها كرامة وفيها العيش والتفكير
كلمة بتعرف تقلب ظلم الظالم وتخليه شايف التغيير وتقول لأ للي حيجي على كل فقير
كلمة قوية نطقها شباب وشيوخ علشان يحكم عادل فاهم مش متوجه يوم بسياسة حد كبير
كلمة وكانت زي الحلم وعرفناها ولمّا نهتف اسمها تاني مش حيكون الرد علينا كلمة " تكفير" 

ابدأ عــــــــدّ !

ابدأ عدّ .. وصلت لألف .. طب استنى كمان ألفين !
امشى ازاي .. شكل الناس مش عارفة أنا مين ؟
مش جبتوني وحكّمتوني ؟
إيه مشكلة ماتوا خمسين ؟ ماتوا سبعين ؟؟
إيه مشكلة القطر ، الماتش .. م كلنا أصلاً يوم رايحين ؟!
ولا حتكفروا بقى يااخوانا وتنسوا الدين ؟
مش راضين .. بدفع ألوفات ؟!
طب الميت من غير ديّة والدفنة حتكون في سكات !
واللي حينطق بكره يبات جنب الحلوين !
وحقول كفرة .. وحقول فشلة .. شوية جهلة ومش فاهمين !
واللي وراكم .. فى صمت وذل حيصبحوا بكرة ومش راضين !
أصل الجهل دي كانت فكرة تجيبهم دايما كده راكعين !
والجاهل مهما حتعمّله .. حيفضل عبد ليوم الدين !
وده كان ردّ الحاكم تعرف .. مين الفاشل .. طب قولوا مين ؟؟!

مأساة حادث قطار أسيوط 17 نوفمبر 2012